الفنانة [ هبة حسن ] رفض أهلي للتمثيل سبب نجاحي
أجري الحوار : عمر آدم
إعداد صحفي : نورهان هاني
إيه المسلسل اللي يعتبر كان بدايتك الحقيقية فيه ؟
أنا بعتبر بدايتي الحقيقية مع النجم “يحيى الفخراني” لما كان طالب وجوه جديدة عشان يعملوا دور بنته في مسلسل شرف فتح الباب و هو اختارني و قعدنا مع بعض و مع المخرجة و هو شاف إني أصلح واحدة أني أعمل دور ندى بنته و عملته الحمدلله من هنا كان دخولي المجال الفني ، و مسلسل شرف فتح الباب كان متشاف الحمدلله بشكل كويس و عملت برضه مع أستاذ ” نور الشريف ” متخافوش و مع أستاذ “حسين فهمي” في مسلسل مكتوب على الجبين كنت عامله دور بنته لما كنت في 3 ثانوي .
عندك فانز كتير على سوشيال ميديا ومن زمان وأنت بتعملي فديوهات هل السوشيال ميديا كانت سبب رئيسي في إكتشاف أن عندك موهبه ؟
أنا بشتغل من ثانوي و فانز السوشيال ميديا ملهاش علاقه بالتمثيل السوشيال ميديا أهتميت بيها من سنتين أو تلاته حتى حاليا إهتمامي بيها قليل .
مسلسل[ للثروة حسابات أخرى ] كان أول عمل الجمهور يبدأ يشوفك فيه إحكلنا عن دورك فيه ؟
مسلسل ” للثروة حسابات أخرى ” عن ” إسماعيل عبد الحافظ ” الله يرحمه كان أول تجربة ليا كنت مرعوبه جداً و كان دور كويس و أستاذ ” إسماعيل ” كان بيوجهني دايما و أستفدت منه كتير جداً على الرغم من خوفي و المخرج ” إسماعيل عبد الحافظ ” أكبر مخرج في مصر فا ده كان عاملي حالة رعب كمان وكان بيعاملني كأني بنته وعلمني إزاي أقف قدام الكاميرا .
أثبتي نفسك في مسلسل [ بابا المجال ] بدور مختلف عليكي إحكلنا أكتر عن الشخصية ؟
بابا المجال كان دور مختلف و كان نفسي أعمل دور شعبي بس كل ناس كانت شايفه فيا أني الرقيقه و ما صدقت أن دور ده جالي و فرحانه أوي ب دور مها و أول أما الورق جالي شدني ككل و شخصية مها شخصية البنت اللي مش عايزه تتجوز ونسيت الموضوع و دايما الناس بتبص للبنت اللي بتتأخر في الزواج نظرة مش حلوة مش عارفه ليه مع أني شايفه إنها قسمة ونصيب و أنا ضد الضغط ده على البنت بهدف الزواج .
بما أنك بدأتي في سلم النجاح قوللنا إيه اللي نفسك تحققيه أكتر ومين الممثلين اللي نفسك تشاركي معاهم في أعمال ؟
الحمدلله اللي نفسي أحققه أكتر نفسي في أدوار كتير أعملها و سينما و مسرح و ربنا كريم و إن شاء الله يكرمني أما الممثلين اللي نفسي أشارك معاهم أعمال نجوم كتير مفيش فنان معين عشان كل فنان و عنده أعماله و جمهوره و تميزه فا الموضوع صعب أنا نفسي أشتغل مع كل النجوم .
شاركتي في مسلسل سعودي [ بيوتي كلينك ] قوللنا حبيتي إيه أكتر الدراما المصريه أو سعوديه ؟ وهل تكرري تجربتك تاني في دراما سعوديه ؟
بالنسبة للمسلسل السعودي كان مسلسل جميل أوي و كنت بحبه و كان إنتاج سعودي و الممثلين كانوا من جميع أنحاء الوطن العربي كله وكنا بنصور في رمضان كنت حاسه إني في لبنان و سعودية و مصر و الإمارات كنا بنحس بالوحدة العربية الموجودة و كنت سعيدة جدا بيه و أتذاع على شاهد و أتشاف بطريقة كويسة برضه وعندي جمهور سعودي كتير الحمدلله و طبعاً الدراما السعودية أتبسطت بيها وأكيد أكررها تاني .
عائلتك كانت رافضه فكرة التمثيل فالأول ودخلتي كلية حقوق إزاي اقنعتيهم فيما بعد بالتمثيل وبموهبتك ؟
الفكرة إن والدتي كانت خريجة كلية حقوق و كان نفسها إني أدخل حقوق زيها و مكنش فيه أي دعم من الأسرة إني أدخل معهد التمثيل ولو رجع بيا الزمن و كنت أقدر أدخل فيها المعهد كنت أكيد هدخله عشان مهم إنك تدرس حاجه بتحبها من و أنت طفل فأما تيجي تدرسها أكيد هتنمي الموهبة وهتبقى سعيد عشان بتدرس الحاجة اللي بتحبها بس الحمدلله ربنا كرمني وأنا في ثانوية مثلت مع دكتور “يحيى الفخراني” مدرسة كبيرة أشتغلت معاه و أتعلمت منه حاجات كتير و أستاذ “نور الشريف ” و أستاذ “حسين فهمي” شغلي معاهم فادني جداً كأني دخلت أكاديميات كتير الحمدلله .
إحكلنا عن مشوارك للتمثيل وإيه الصعوبات اللي كانت بتواجهك ؟
كان الموضوع صعب عشان أنا جيت من إسكندرية و حاولت أدخل المعهد و بدأت أسعى و أخد ورش تمثيل و أروح و أرجع من اسكندرية للقاهرة في نفس اليوم و كانت معايا والدتي لأن سني كان صغير 16 سنة أو والدي وشافوا أيام صعبة معايا في البدايات و أما يطلبوا وجوه جديدة كنا دايما نروح الإختبارات بتاعتهم فا موضوع مكنش سهل بالإضافة إلي وجود دراستي .
قبل ما تدخلي مجال التمثيل كنتي بتملي وقت فراغك بإيه ؟ وهل بدأتي في عمل قبل التمثيل ؟
أنا ملحقتش يبقى ليا وقت فراغ من و أنا طفلة 4 سنين كنت بفضل أقلد الممثلين و أنا حياتي من و أنا صغيرة كنت بعب مع قرايبي و صحابي في وقت فراغي و كانت لعبتي المفضلة زمان إني أعمل زي فيلم و أدي لكل واحد دوره كأننا بنمثل حاجه درامية من خيالي دي كانت هوايتي و أنا طفلة و بعدين أما كنت في ثانوي حبيت إني أدخل معهد تمثيل و أتعلم أكتر و أعمل ده في الحقيقة فا مكنش عندي هواية غير التمثيل .
