الفنانه [ لبنى ونس ] الفضل لربنا ثم للمخرج [ محمد سامي ]
أجري الحوار : عمر آدم .
إعداد صحفي : نورهان هاني .
لمشاهدة اللقاء فيديو 👇🏻👇🏻
https://fb.watch/kewSJM2VII/?mibextid=Nif5oz
حضرتك بتفضلي أنهي أكتر السينما و لا المسرح و خاصاً أن بداية حضرتك كانت فالأول متركزه في المسارح أكتر ؟
المسرح أبو الفنون وهو الأساس بالنسبالي .
أداء حضرتك في مسلسل “كفر دلهاب” لفت الأنظار وقتها كان دور مميز جداً ممكن تحكلنا أكتر عنه ؟
مسلسل [ كفر دلهاب ] كان من أصعب الأدوار لأنه كان جديد بالنسبالي كان نفسي من زمان أعمل دور ساحرة أو شريرة فا لما جالي كفر دلهاب كان فرصة بالنسبالي ذاكرته كويس أوي الحمدلله عشان أقدم دور الساحرة بشكل مختلف متقدمش قبل كده و الحمدلله نجحت و ده بسبب إني ذاكرت الدور كويس أوي و طبعاً بتعليمات المخرج الكبير [ أحمد جلال ] و اتشرفت جداً بالعمل معاه و الحمدلله الدور نجح جداً و كان هو فاتحة خير عليا من قِبل الجمهور إنه يعرفني و أرجع تاني أخد وضعي بعد ما بعدت عن الوسط 15 سنة .
أكتر دور حضرتك شيفاه قريب من شخصيتك كان دور إيه و ليه ؟
حقيقي كل دور أم عملته عملته الحمد لله بإحساسي و عيشت الدور كويس أوي فصعب إني أميز دور عن دور لكن خليني أقول أن في مسلسل [ كأنه امبارح ] والدة رامز و في مسلسل [ رحله ] والدة كارمه و في مسلسل [ جعفر العمده ] في دور والدة سيف و طبعاً دور فاطمه بما أنه أخر دور و حصيلة تجارب سابقه فا الحمدلله نجح بفضل الله و بفضل توجيهات المخرج الكبير [ محمد سامي ] و بفضل تعبي و مجهودي فيه الحمد لله .
مسلسل ” ضمير أبله حكمت ” كان أول مسلسل في مسيرة حضرتك ؛ ممكن تقوللنا مين اللي رشح حضرتك للدور وإيه الصعوبات اللي حضرتك واجهتيها بما إنه أول عمل ليكي ؟
مسلسل [ ضمير أبله حكمت ] كنت لسه طالبة في المعهد أترشحتله من قِبل الأستاذة العظيمة [ إنعام محمد علي ] و طبعاً كنت مرعوبة لأنها كانت أول مره أقف قدام كاميرا كان المسلسل بطولة الله يرحمها [ فاتن حمامه ] و مجموعة كبيرة من النجوم و من النجوم المتصاعدة وقتها لكن الحمدلله عدت على خير .
بعد غياب سنين عن الوسط الفني حضرتك رجعتي تاني وكانت البداية مع مسلسل “الداعية” ؛ ممكن تحكلنا أكتر عن دورك ؟
الداعيه رشحني فيه المخرج الجميل الموهوب الأستاذ [ محمد العدل ] و كنت رايحه أعمل كاست عليه لكن هو أول لما شافني أفتكرني لأنه كان المساعد الأول [ لخيري بشاره ] وقتها على ما أتذكر و أول لما شافني طبعاً أسند إليا الدور من غير الأوديشن و كانت برضه فاتحة خير عليا الحمد لله و الداعيه أول دور عملته بعد ما رجعت من 15 سنه غياب و نجح الحمد لله .
تالت دور لحضرتك مع الفنان” محمد رمضان ” ممكن تقوللنا عن تجربتك مع الفنان ” محمد رمضان ” ؟ و هل تجربة ممكن حضرتك تكرريها تاني ؟
عملت ثلاث تجارب مع النجم [ محمد رمضان ] كانت أول تجربة في مسلسل [ زلزال ] للمخرج المبدع [ إبراهيم فخر ] و الحمد لله الدور نجح جداً و تاني تجربة كانت مع الأستاذ المخرج [ محمد سامي ] في [ البرنس ] و الحمد لله الدور نجح كنت والدة لبنى كانت حماة النجم [ محمد رمضان ] وسعيده بالتجارب معاه وأكيد هكررها تاني .
حضرتك السنادي طالعه بدور متألق جدا في مسلسل [ جعفر العمده ] ممكن تحكيلنا تفاصيل أكتر عن طبيعة الدور ؟
دور فاطمة في [ جعفر العمده ] البنت اللي اتعقدت من عدم الخلفه و اتطلقت مرتين و التالت استغلها و جابلها طفل و بعدين اختفى و بعدين رجع تاني يقولها أنا عايز أقتله فا خافت و قالت ده مات فطلبت من والدها أنه يكتبها بإسمه و خدته و بعدت بعيد و ربته و فجأه يظهر تاني بلال شامه اللي ضحك عليها و أخد دهبها و جابلها الطفل ده فا الدنيا تتقلب فا كان دور صعب و في صراعات كتير نفسيه و نجح الحمدلله و لقى إستقبال جيد جداً من قِبل الجمهور اللي كل حاجه صادقه بيحسها لأنه واعي و سبب نجاحه كان بفضل الله أولاً ثم بفضل الأستاذ [ محمد سامي ] و تعبي و مجهودي فا الدور ده و أعتقد إنه من أهم الأعمال اللي عملتها و المخرج الأستاذ المبدع [ محمد سامي ] اللي من بعد ربنا سبحانه و تعالى له الفضل إني أخد المكانه دي مكانتي اللي كنت بطلبها من ربنا إني أعود إليها فالحمد لله .
المخرج ” محمد سامي ” متألق ومميز دايما في إخراجه هل الإخراج كان ليه دور كبير شجعك على العمل في مسلسل ؟
المخرج [ محمد سامي ] مخرج بيمتلك أدواته و موهوب و بيعرف يقدم تشويق عالي للمتلقي فا طول الوقت يفضل متشوق إنه يكمل معندوش توقعات أجمل حاجه بيعملها حقيقي من الحاجات الجميله اللي بيعملها إنه طول الوقت بيحط المتلقي في إنتظار متعرفش تخمن إيه اللي هيحصل يعني صعب مع الأستاذ [ محمد سامي ] أنك تحرقله موقف هو عايز يوصلك إليه لأ أنت بتفضل مستني لغاية ما هو يكشفلك عنه و لأنه بيحب الممثل أوي حقيقي مسابنيش و مسابش كل الممثلين في كل تفصيله و مبخلش علينا أبداً أنه يوجهنا كل واحد في دوره فالحمد لله على وجود مخرج مخلص زيه في حياة الممثلين .
حضرتك حابه تضيفي حاجه في نهايه الحوار ؟
و إضافه أحب أضفها أنا بشكر الأستاذ [ محمد سامي ] لتمسكه بيا في دور فاطمه في مسلسل [ جعفر العمده ] الحمدلله و مبروك علينا كلنا نجاح المسلسل الحمد لله .
