خفة دم ام كلثوم
كتبت / غادة العليمى
كثير من جماهير أم كلثوم يعرف عنها غير صوتها الرائع واغانيها الخالدة
اما ما لم يعرفه عنها كثير من جماهيرها انها كانت خفيفة الظل فى سيرتها كثير من الحكايات المضحكة والقفشات اللطيفه مثل ،،،ط
وهي مسافرة بالطيارة فضلت طول الرحلة تتكلم مع مضيفة من مضيفات الرحلة
لدرجة لفتت انتباه أعضاء فرقتها
فواحد منهم سألها بعد ما وصلوا المطار
هو انتي تعرفي المضيفة دي يا ست ؟!
قالتله : أبدًا ولا عمري شوفتها قبل كدا «دي معرفة طياري»
– مرة تانية واحد من فرقتها أشترى بدلة جديدة ، فراح للست ياخُد رأيها في البدلة قالتله بعدم أهتمام مش بطالة .. الراجل ماقتنعش باللي قالته وحس إنها بتجامله وخلاص ، فحب يجيب رجلها في الكلام أكتر قالها :
طيب يا ست إنتي مش شايفة إنها واسعة شويتين ؟!
قالتله : معلش يا حبيبي خلاص «روح ربنا يضيّقها عليك»
– في أحدى السهرات ولما بوفيه العشا إتفتح راحت للبوفيه وكان على يمينها أحمد شوقي وعلى شمالها حافظ إبراهيم وكان الإتنين في التوقيت ده كبروا في السن شوية .. بصت عليهم ولاحظت إن الإتنين ضهرهم محني من تأثير تقدم العمر قالتلهم :
أنا مش حاسة إني ماشية بين أكبر شاعرين في الوطن العربي .. أنا حاسة إني ماشية بين قوسين
– مرة كانت قاعدة في مكتبها بتمارس شغلها كرئيس لنقابة الموسيقيين ومعاها الموسيقار الكبير محمد القصبجي ..
والقصبجي كان مشهور بإنه بيصبغ شعره كتير أوي ، وهما قاعدين دخل عليهم موظف من موظفي النقابة وقالها :
يا ست فيه ورق مش عارفين نبعته عشان مش لاقيين الختّامة .. راحت الست باصة للقصبجي وقالتله : «وحياتك تقلعله الطربوش يختم بيه الورق»
– في فترة من الفترات كانت الست زعلانة من الصحفي محمد التابعي الراجل كان بيحاول يصالحها بكل الطُرق وهي مش طايقة تشوف وشه ، في مرة منهم قرر إنه يستناها تخرج من البيت ويفاجئها ويطلب منها تصالحه ، الراجل فضل قاعد قدام الڤيلا بتاعتها وأول ما شافها خارجة جري عليها عشان يصالحها .. فالست حبّت تخلع منه قالتله نتكلم وقت تاني عشان أنا مش فاضية دلوقتي وعندي مشوار مهم قالها : طيب هو مشوارك فين يا ست ؟
قالتله : في حدايق القبة
قالها : كويس .. خُديني معاكي في السكة عشان عايز أتكلم معاكي شوية
فقالتله : يا تابعي بقولك رايحة مشوار حدايق القبة مش حدايق نفسي
– في إحدى الحفلات وهي بتغني وملعلة قام راجل من الجمهور وقال بصوت عالي : يا جاموس الفن يا ست
الست غضبت جدًا وتوقفت عن الغناء وقالت بعصبية : إنتَّ بتقول إيه يا راجل إنتَّ ؟! وكانت هتنهي الحفلة فعلًا لكن واحد من أعضاء فرقتها الموسيقية قالها وهو بيضحك إن الراجل مش قصده خالص الإساءة وإنه صعيدي ودي لغتهم بينطقوا القاف جيم وإن قصده يقول يا قاموس الفن يا ست .. الست ضحكت وبصت للراجل وقالتله : عندك حق بس فين «العجول».. اللي تفهم !
– في مرة إتقابلت مع إسماعيل ياسين صدفة في صيدلية في محطة الرمل بالإسكندرية وأول ما شافت إسماعيل خدت بالها إنه كان لسه بيوزن نفسه قالتله : ها يا سمعة وزنك طلع كام كيلو ؟
قالها : طلع ٧٨ كيلو
قالتله : مش معقول .. أكيد وزنت نفس من غير بؤقك !
رحمة الله عليها
