سعيد صالح حج لاربعة عشر مرة متتالية وتحدث الى الله وآمن لقاؤه
سعيد صالح كما لم يعرفه احد
الحاج سعيد صالح
كتبت / غادة العليمى
ثمة صفحات مستتره من حياة الفنانين صفحات شخصية جدا لا يعرفها احد
وتكشفها بعض الاحاديث الخاصة جدا حين يفتح الفنان قلبه فى لحظة صدق وفيما يلى سطور تحوى حالة خاصه جدا واسرار فى حياة النجم سعيد صالح افضى بها للاعلامى عمرو الليثى فى لقاء من كنوز الاعلام المصرى حيث دار بينهم هذا الربورتاچ ؛؛
– ليه حجيت ١٤ مرة وخليت مراتك تتحجب مع انها كانت ممثله شاطرة وفي بدايتها، ليه حجبتها وانهيت علاقتها بالفن؟
=لاني كنت محتاج لده …وهي كمان كانت محتاجة دا،كنت بحبها وخايف عليها،خايف من الفن والوسط الفني، وكنت خايف من ربنا !!
_طب والعمرة يا عم سعيد ؟!
_كنت بني ادم زي اي شاب، بعمل كل حاجه وطايش ، وفجأة دخلت السجن قعدت _سنه ..السنه اللي قعدتها في السجن كانت سبب تغيير حياتي خالص، قابلني واحد اسمه عم يوسف لسه بعرفه لغاية دلوقتي .. هو عرف اني موجود ف السجن، فبعتلي فمروحتش، وبعدين قررت اروحله ..لقيت زنزانته مليانه خير وأكل ومليانه ناس وعساكر!!
كان تمامنا الساعه ٥ في السجن، وبعدها بيقفلوا كل الزنازين، الا هو كانوا بيقفلوا زنزانته، بعد معادنا بساعتين، خدني وطلعنا جرينا في السطح ولقيته بيقولي مش عايز ربنا يكلمك ؟
قولتله ربنا ؟! .. يكلمني انا ؟! طب ازاي ؟
قالي اقرا قران هتلاقي ربنا بيكلمك ..سمعت الكلام ده وروحت جايب مصحف وبقيت اقرا واحفظ واسمعله تاني يوم، لغاية ما بقيت بصلي واصوم ولقيت السنه مرت جميلة جدا، وعرفت حاجات كتير كانت غايبه عني …خرجت من السجن قولت يارب عمرة بقى ..طلعت حجه ..حجيت ١٤ حجه ورا بعض …سنه واحده بس اللي محجتش فيها، اللي هي السنادي بتاعة انفلونزا الخنـ.ازير لكن ان شاء الله هكمل، والسنة الجاية هعمل حجة
لما روحت لقيت صدري انشرح كدا، وحبيت الحكاية وتدينت جامد وانا اصلا والدي كان ازهري وكان عايز يطلعني حافظ قران بس انا طنشت وكان طيش الشباب بقى !
– خايف من مقابلة ربنا يا عم سعيد ؟
– ماهو لازم اخاف وكلنا نخاف بس احنا لو وضبنا نفسنا مش هنخاف ..اينعم ليا تاريخ مزفت بس اللي عملته هيغفرلي ان شاء الله، وانا واثق ان ربنا هيغفرلي
الراحل سعيد صالح في لقاء تلفزيوني مع عمرو الليثي
رحمه الله وغفر له
