لام شمسية واغتصاب ياسين .. حينما يكون الواقع أصعب بكثير من الخيال
لام شمسية واغتصاب ياسين .. حينما يكون الواقع أصعب بكثير من الخيال
لام شمسية .. علي ارض الواقع وبعيداً عن الدراما تحدث كوارث أصعب بكثير من خيال الكتاب والمؤلفين.
فكل يوم نشاهد حوادث بل فواجع أصعب وأمر مما نشاهده علي الشاشة بل إذا ماتم عرضه كما هو سنسخر بلا شك ونردد المقولة الشهيرة : مؤلفين خيالهم واسع .
دون ان ندرك أن العكس هو الحقيقة المؤلمة .
بقلم / دعاء جلال
فهذا المسلسل المؤلم الذي لا ينتهي ولم نكن ندرك أبدا إنه من الممكن أن يأتى علينا مثل هذا اليوم لنعيش ونشاهد كل هذا الكم البغيض من الإنحرافات .
إضطرابات جنسية وتابوهات مغلقة
وسأحدثكم في السطور القادمة باللغة العامية العادية الدارجة بين البسطاء .
المسلسل الواقعي اللي مبيخلصش التحرش بالاطفال والتعتيم علي الافعال الغير اخلاقية أصل دا تابوه اصل الناس هيقولوا ايه ؟!! والمدرسة سمعتها تتهز ليه؟! والراجل كبير طيب ازاي ؟!
ودي شكلها طبعاً حرب من الخرفان علي الكنيسة و…. و….. و…….
وانا بقي احب اقولكم ان المسلسل دا عمروا ما هيخلص بـ الهيصه والترندات والهاشتاجات
واننا لازم نفهم الحكاية من بدايتها وأين الخلل الحقيقي .
من المسؤل ؟!
تعالوا بقي هنا كلكم مسئولين ولا أستثني منكم احداً من أول الأم اللي المفترض تسأل اولادها يومياً بتعملوا ايه ويومكم مشي ازاي وقابلتم مين واتكلمتم مع مين ودور الرقابه والمتابعة اللي هو لب الأمومة والمسؤليه للأب اللي بقاله سنه ونص ساكت علي حق عرض ابنه .
وقـتل برائته مروراً بالمديرة والعامله وكل شخص من الذين لم يراعوا حق الله وامانتهم وكل المهم هو سمعة المدرسة وخلافه لدرجة التكتم علي فضيحة اخلاقية وانسانية انا بجد حزينة علي الوعي المجتمعي اللي بيختزل واقعة التعدي ياسين علي إنها واقعة تحرش وفقط ….
الوعي المجتمعي
اسمحولي الامر يتعدي هذه الواقعة وهذا الوسم ، خلينا نجيبها من البداية في رحلة للبحث عن الوعي المجتمعي والثقافة العامة للمجتمع
فين التوعية الجنسية للأطفال وحدودهم وحدود الاخرين علشان يحموا جسدهم ؟!
فين الثقة اللي الأهل لازم يزرعوها في ابنائهم .
أي حاجة تحصل انت ليك حق ومتخافش واحنا عارفين انك مش كذاب .
فين دور الام والاب في كونهم مصدر أمان وأن أي حاجة تحصل فيها شيء مضر او مؤلم أو قاسي أنا معاك وفي ضهرك .
فين دور المدرسة من أول المديرة مروراً بالمدرسين للعاملات لرجال الأمن للمسئولين .
و فين دور المدرسة ككيان للتربية قبل التعليم ؟!
البيضة ولا الفرخة
نحن بصدد دائرة مغلقة ومش هنقول البيضة ولا الفرخة لأن كلنا عارفين ان السبب الاساسي مش وجود المتحرشين لانهم موجودين وهيفضلوا موجودين زيهم زي اي مرضي مضطربين مش هيخلصوا ..، لكن المسؤل اللي لازم يتحاسب هو اللي بيسعي للانجاب وهو لا يعلم تكلفة وجود طفل في العالم بدون توجيه وارشاد ومتابعة مينفعش اسيب ابواب وشبابيك بيتي مفتوحة وارجع ازعل ان بيتي اتسرق .. الانجاب هو مسؤليه تتلوها مسؤليات اخري غير منتهية والمسؤال هو الابوين مفيش حد يسبقهم في المسؤليه
التوعية التوعية التوعية وبعين المتابعة والرقابة التربية مش تمرينات واكل ولبس ومذاكرة التربية تختلف عن الرعاية متسيبوش الارض تربي وبعدين تزعلوا من المجتمع ، أعمل دورك وبعدين نظر علي الناس
الشارع فية مختلين وحرامية ومضطربين وسفاحين وولاد ستين في سبعين يا معلش تتعبوا شوية و تربوا اولادكم وتوعوهم وتعلموهم يحموا نفسهم من كل دا وتأكدولهم بالقول والفعل انكم معاهم وفي ضهرهم تحت اي ظرف ياما تحبسوهم في البيت أحسن
استقيموا يرحمكم الله .
حق ياسين لازم يرجع
