مبخرة وطلاسم واستخدام طفل حديث الولادة وامه لجلب الجماهير

طقوس غريبة

كتبت / غادة العليمى

من اغرب طقوس الفنانين اللى ممكن تسمع عنها ..طقس الفنانة الكبيرة فاطمة رشدي قبل افتتاح اى مسرحية لفرقتها..

الست فاطمة كانت لازم قبل الافتتاح بيوم تجمع كل اللى شغالين فى المسرحية واللى شغالين فى الكواليس والعمال وبتوع البوفية واللى فى شباك التذاكر وتلف عليهم واحد واحد بالمبخرة.. وترجع تعيد الكرة مرة واتنين وتركز اوى على اللى شغال فى شباك التذاكر عشان ربنا يطرح فى ايده البركة ويبيع تذاكر كتير..

والحقيقة ان ده طقس كان مقدور عليه.. اصل اخره ايه يعنى.. شوية فحم وحبة بخور.. تمشي. لكن الست فاطمة كان لها طقس كمالة من غيره لا ممكن تفتح العرض.. طيب الطقس ده يا فندي؟
قالك كانت تدور على اى ست لسه مخلفة جديد وتطلب منها انها تحضر اول ليلة عرض.. بشرط انها تقعد بابنها الرضيع على باب المسرح وانه يفضل يعيط .. علشان عياطه قال ايه يطرد الارواح الشريرة ويبعد عنها الحسد والنحس..

والحقيقة ان الست فضلت فترة محافظة على هذا الطقس.. لكن فى النهاية ورغم البخور الكتير ورغم العياط الكتير الفرقة خسرت واتحلت.. واكتشفت الست فاطمة انه لا البخور بينفع ولا العياط بيشفع.
اذا كانت النهاية خسارة فادحه فى النهاية