مشاهير اليوتيوب .. يوسف القط

= كتب : ابراهيم مرزوق

= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير )  فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( يوسف القط ) ..

= يوسف القط وجه شديد الخصوصية ملامحه تشع بالموهبة فهو يقدم أعمالاً مميزة فى مجال التمثيل .. فهو يعرف ان فن التمثيل واحداً من أهم مجالات القوة الناعمة فى العالم .. ولأنه يعلم ان التمثيل من المهن التي تتطلب موهبة واجتهاد حقيقي حتى يصل المُمثل إلى الجمهور بصدق فهو دائم الاجتهاد والتفكير فى كل ما هو جديد .. لان الجمهور ذكي وواعي بشدة ولديه حاسة سادسة يستطيع من خلالها التمييز بين الفنان الحقيقي والمزيف ..

 = تحدث يوسف لـ ( أسرار المشاهير ) فقال : أسمى يوسف القط ودراستي هندسة مدنية .. شهرتي فى البداية كانت عن طريق الفيسبوك .. فيديو عملته مع صحابى كان صدفة وهزار بدون أى إمكانيات بدون أى إضاءة أو أى حاجة .. ماكنتش أعرف يعنى ايه مونتاج .. ماكنتش أعرف يعنى أيه إخراج ماكنتش أعرف أى حاجة بمعنى الكلمة .. المهم فضلت أدور على النت .. نزلت الفيديو الناس بدأت تجاملني حلو يا يوسف .. انا الموضوع عجبنى وبدأت انزل أكتر بعدها الناس بدأت تقول لى خلاص عشان قولنالك حلو استحليتها بقى .. الفكرة انى خدت انتقادات كتير جدا فى البداية ..

= اتعرضت للسرقة من مشاهير السوشيال ميديا .. لأنى كنت لما باحاول أطور من نفسى باصور بالموبايل بس كل الناس كانت معتقدة ان تصويري كاميرات وبروفيشنل بسبب انى بالعب على تعديل الألوان .. وكنت باطور من نفسى فى حاجات انا قادر اعملها .. وكنت باعانى جدا فى بدايتي أن معظم المشاهير بيتابعونى بس مش بيعملولى فلو ومش معرفين الناس أنهم يعرفونى انا كنت مش معروف بشكل كبير .. فكانوا بيشوفوا الأفكار اللى انا عاملها ويقلدوها .. وكنت باشتغل على نفسى جدا فى موضوع الأفكار وأحاول اعمل محتوى خاص بي في لمساتى الخاصة مش باحاول ابص لغيري وكنت اكره كره العمى التقليد .. هما كانوا يشوفوا المحتوى وياخدوا الاسكريبت وكل حاجة وينزلوها باسمهم عشان انا ماعنديش متابعين .. ولو الفيديو بتاعى اتشاف ماحدش بيروح يبص على تواريخ النشر فالناس بتتهمنى ان انا اللى سارق ..

= انا كنت لوحدى فى بدايتي تماماً ماحدش بيساعدنى .. وعملت فيديو على الفيسبوك ماكنتش مديله اهتمام بعدها نشرته على الانستجرام وكنت مبسوط جدا أنه فى خلال اسبوع أخد ألف مشاهدة .. لقيت الفيديو ده ضرب على الفيس بوك وجاب 400 الف مشاهدة على قناتي الشخصية اللى كان فيها ألف متابع والفيديو انتشر بشكل كبير جداً .. وكان وقتها عندى 11 الف على الانستجرام .. والفيديو لما انتشر ناس أخذت الفيديو وحطوا اسمهم عليه ولما كنت أروح اكلمهم يحطوا أسمى عشان حقوقى ومابقاش تعبت على الفاضى كانوا بيرفضوا طبعا .. وفعلا اتخنقت جداً فى البداية وكنت باعمل ريبورتات على أساس انى اقدر أشيل الفيديوهات وفعلا بعض الفيديوهات اتشالت بعد ما جابت 5 او 6 مليون مشاهدة على قنوات غير قنواتي .. وكانت المشاهدات عالية جدا فى الصفحات التانية حتى الإعلامي مصطفى الأغا شاف الفيديو ده ونزله عنده على صفحته الرسمية .

= بعد كده أول ما وصلت 20 ألف متابع على الانستجرام وقتها عملت شخصية اسمها مصطفى شخصية نص إماراتي ونص مصرى الفكرة منها أنه يتكلم ميكس لهجة خليجي مصرى فانا شهرتي فى الانستجرام كانت فى الخليج .. وماكنتش معروف فى مصر لحد ما دخلت اليوتيوب .. أول فيديو اعمله لشخصية مصطفى كان أول فيديو يجيب مشاهدات عالية بالشكل ده وجاب فى خلال أول ساعتين 20 ألف مشاهدة وكان بالنسبة لى إنجاز غير طبيعي .. قلت خلاص اقفل الفيديو وانزل الجيم وارجع أشوف الفيديو وصل لكام .. روحت الجيم ورجعت لقيت الاكونت أتقفل تماما .. ماعرفتش ليه السبب وقتها اكتئبت بشكل غير طبيعى .. وكل جهد السنتين راح على الأرض خلاص .. بعدين قررت أوقف السوشيال ميديا خالص .. لانى حاولت فى خلال اسبوع او عشر أيام انى ارجع الاكونت بأكثر من طريقة ماعرفتش وقبلها بحوالى شهرين كنت أتعرفت على مجموعة مشاهير من الإمارات ودخلت المجال بتاعهم ..

= المهم وقتها أتكلمت معاهم .. كان عندهم جروب علي السوشيال ميديا .. قلت يا شباب لو عملت أكونت تانى تدعموني على الاقل بستورى لان الاكونت القديم أتقفل وبافكر اعمل واحد تانى .. قالولى توكل على الله واعمله .. فعلا معظمهم ساعدني ووصل الاكونت فى خلال يوم 5 آلاف متابع ودى كانت حاجة كويسة .. وعدت الايام بعد ما وصلت 10 آلاف متابع بجرب افتح الاكونت القديم لقيته رجع .

= بعد ما وصلت حوالى 130 ألف متابع على الانستجرام قررت انى ادخل اليوتيوب فانا كنت منعزل تماما عن السوشيال ميديا .. ولما دخلت اليوتيوب فضلت فترة مش عارف ازيد والزيادة بدأت خطوة خطوة ووقتها كانت بداية شهرتى فى مصر واسمى أصبح مسمع كان بيوصلى أن الناس ماشية تشغل فيديوهاتي فى الشارع .. وانا دخلت اليوتيوب وانا بأقدم محتوى الريأكت رغم انى مش باحبه بس عملته لغرض واحد هو إرضاء الجمهور وعشان اقدر اجذب جمهوري تشوف موضوع التمثيل اللى باحبه فعلا .. لان الريأكت مافيهوش كمية الإبداع اللى فى التمثيل او التعب اللى فى فيديوهات التمثيل .. يعنى انا باتعب فى قناة ازرق فى تمثيل وتصوير وإخراج .. لكن زى ما تقول اللى اكتشفته فى السوشيال ميديا او فى الحياة بوجه عام انك لما بتتعب على حاجة جدا مش بتجيب النتيجة المرجوة منها ..

= انا دايما باشتغل على المحتوى عشان افتخر انى قدمت محتوى جيد .. وبدأت اشتهر بالريأكت وعجب الناس اسلوبى فى تقديم الفيديوهات اللى تنفع لأفراد العيلة والحمد لله مش باقول ألفاظ خارجة فى فيديوهاتي وكل الحاجات دى كانت فى صالحي جداً .. بس للآسف لما جربت مرة واتنين انزل فيديوهات تمثيل كنت بالاقى إقبال على فيديوهات الريأكت أكثر من التمثيل وكانت المشاهدات فى الريأكت أكبر .. بالرغم من كده مستحيل اسيب التمثيل اللى انا باحبه .. ووقتها عملت قناة ازرق ..

= قلت لمتابعين قناتي الأساسية لو قناة ازرق الجديدة وصلت 50 ألف متابع أنا هعمل لكم مفاجأة وأقول لكم محتوى القناة .. فى خلال يومين وصلت 50 ألف .. ساعتها انا أتورطت وقلت لهم لو ينفع توصلوا القناة دى 100 الف لحد يوم السبت الجاى الفيديو هينزل يومها عشان أخد الدرع الفضى .. وفعلا قبل نزول الفيديو بربع ساعة كانت وصلت 100 الف متابع .. واصبحت أول يوتيبر عربي يجيب 100 ألف مشترك من غير ولا فيديو ..

= بعض الشخصيات اللى قدمتها حققت نجاح كبير ومنهم شخصية عمر .. هو شاب بس جواه براءة الأطفال شخص مش موجود فى الايام دى كتير .. وفيه شخصية مصطفى وفيه شخصية مصرى مان ورجب الصعيدي .. بس الشخصيات دى لم تستمر وعملت عليها كام جزء ووقفتها .. وانا للأسف ماحدش كان بيشجعنى وكنت دايما باتهاجم حتى أهلي قالوا دى حاجة ضاربة فى دماغه وشوية ويبطل لحد ما فى يوم جبتلهم أول صحيفة بتتكلم عنى وبدأوا ساعتها يعرفوا انى باعمل حاجة كويسة ..

= حبيت أطور من نفسى رغم ان مجال اليوتيوب بعيد عن مجال دراستى .. ودايما أطور من نفسى فى كل حاجة هتنفعنى فى القناة وأطور من محتواها .. وانا شايف ان قناة أزرق من أفضل القنوات اللى أتقدمت فى السوشيال ميدي المصرية ودا رأى معظم الناس .. بالرغم أن مافيهاش غير 5 فيديوهات فقط .. والدليل على كده ان الفنان بيومي فؤاد أتعاون معايا وشاف تمثيلى بنفسه ولو ماكنش مقتنع بموهبتي كان رفض يتعاون معايا .. وقدمت معه عملين على القناة وده شرف ليا وهو شخصية جميلة ومحترمة جدا .. حتى هو استغرب لما شاف الفيديوهات وقال انتم عاملين كل الكلام ده منكم ومن غير مخرجين وانبهر لان شغلنا قريب من السينما وبنهتم بالتصوير والإخراج والمونتاج والمحتوى ..

= لما دخلت التيك توك حسابي اتوثق .. والمشاهير أتضايقت منى لانى كنت 10 آلاف متابع فقط .. بس الناس ردت عليهم أنى راجل صانع محتوى فكان دخولي زى دخول الممثلين .. التيك توك عارف انى بأقدم حاجة مختلفة .. وقتها حققت نجاح كبير فى أقل من شهر كنت وصلت 100 الف متابع .. وفى اقل من 3 شهور 600 الف متابع .. فكانت حاجة جميلة جدا بالنسبة لى .. 

= بالنسبة لأحلامي فطموحي الاول هو التمثيل .. بس لو ماجتش الفرصة مش هتضايق لأنى مش ممكن أوافق بأى دور وخلاص أنا عايز حاجة تكون حلوة .. حاجة أحسها قبل ما أمثلها .. وانا حبيت اتعلم ازاى أقف قدام الجمهور فى المسرح فى عروض الاستاند اب وكان أول عرض استاند اب فى الإمارات فى مكان مفتوح وكنت أنا المشهور الوحيد فى الناس اللى بتقدم معايا عروض الاستاند أب مع أنهم مشاهير فى مجالهم وكانوا مقدمين حوالى 100 عرض قبل كده .. ووضعوا فقرتي فى الآخر لأنهم عارفين ان معظم الناس جاية عشانى.. والكراسي خلصت وكان فيه مئات الحجوزات على العرض فى الإمارات وكان الوقت مع بداية شهرتى فى مصر .. ولاقى العرض نجاح كبير جداً .. وانا الحمد لله انبهرت بيه وكان فيه مشاهير كتير موجودين ومعظمهم كانوا متوقعين انه مش هيجي لى حد واندهشوا من الأعداد اللى حضرت العرض وانا كنت متأكد ان الأعمال بالنيات ..

= بدأت الصحف تتكلم عنى فى الموضوع ده .. ورضيت انى ماخدش ولا درهم بسبب انى حبيت كده وكنت باحاول أجرب وفعلا الوقوف قدام الجمهور كان إحساس جميل .. وكان أسعد شعور فى حياتى .. وقدمت بعدها 4 عروض أخرى لاقت نفس النجاح ..