حكاية فنية طريفه
كتبت / غادة العليمى
من اعلى الافلام جماهيرية وطرافة للنجم فريد فيلم “انت حبيبى” الذى شارك فريد الاطرش بطولته شادية .. وهند رستم وعبد السلام النابلسي
و فى هذا الفيلم اسكتش مشهور اسمه “يا سلام على حبى وحبك” كان سبب رئيسيا فى نجاح الفيلم وشهرته لدرجة ان ناس كتير متعرفش الاسكتش اتغنى فى فيلم ايه اصلا .. بس لو سألتهم عن الاغنية نفسها ممكن يسمعوها من اول كلمة لاخر كلمة.. والغير معروف للكثيرين ان الاسكتش ده اتضاف فى الفيلم لان الفيلم نفسه كان ناقص 2 كيلو.. فى الوزن
وانه بعد يوسف شاهين ما انتهى من تصوير الفيلم وبدأ في طباعة النسخ النهائية الجاهزة للعرض، وسلم فريد الأطرش منتج الفيلم نسخ منها ، اتفاجئ بعد أيام باتصال من فريد الأطرش بيكلمه وهو متعصب وبيقوله: إزاي ده يحصل؟، ده خراب بيوت… فيوسف شاهين اتضايق جدا وقاله: إنت حضرتك بتزعق ليه؟، فهمني المشكلة فين علشان نحلها بالعقل، فاعتذر فريد عن أسلوبه وعصبيته وقال لشاهين بصوت ودود ومهذب: الموزع بيقول إن الفيلم ناقص 2 كيلوجرام، فهل نقدر يا يوسف نضيف للفيلم الاتنين كيلوجرام دول لأن ده شرط للتصدير والتوزيع؟
بيقول يوسف شاهين: التزمت الصمت عدة ثوانٍ من الصدمة، وشعرت بالذهول، فأنا لم أتخيل أن أفلامي مثل الخضار يتم وزنها بالكيلوجرام، ثم تذكرت وعدي للأطرش فقلت كل مشكلة ولها حل، سأفكر وأرد عليك غداً.
قعد يوسف شاهين يفكر وكل ما يلاقى فكرة يكتشف انها هتبقى عبأ على الفيلم وممكن تبوظ الفيلم بدل ما تضيف له، وفى النهاية قال طالما ان مشكلة الموزع في الوزن، ممكن نضيف أغنية أو اسكتش غنائي يخدم الأحداث من غير ما يتصادم مع الدراما، وعرض الفكرة على فريد الأطرش فرحب بيها جدا وتم تكليف الشاعر فتحي قورة بكتابة كلمات دويتو غنائي بيجمع بين فريد الأطرش وشادية بإسم يا سلام على حبي وحبك، وأخرجه شاهين بطريقة ساخرة مبتكرة، لدرجة أنه نجح أكثر من الفيلم.
