طبعا اتعودنا من زمان ان نسمع تأليف و كذب و بنطنش لكن في ذكراه تطلعلنا واحدة مش معروف اصلا هي مين و مش حأتقدم و الا تأخر حاجة و زي المثل ما بيقول “القافلة تمشي و الكلاب تعوي” لكن للحقيقة شيء معيب و مستفذ….

أولا، و للشهادة و كلمة الحق أن السيدة أم كلثوم كانت تحب محرم جدا و تناديه ب “يا ابني” و هي من توصطت للرئيس جمال عبد الناصر علشان يعيدوا اذاعة اغانيه و يرجع مصر بعد ما غاب فترة و منعت اغانيه لأنه كان يعمل في لبنان بعد النكسة ليرتذق و سجل غنوة للسعودية وقتها! و لولا أم كلثوم ما أعطى الرئيس جمال عبد الناصر هذا الامر و عاد محرم لمصر و عمل اكبر حفلة و غنى سلامات يا حبايب و بلادي بلادي و انا لا اشكو! و محرم ابن بلد و يعرف الاصول كويس جدا و كان يقبل رأس ام كلثوم دائما مش بس يدها! فهي بمثابة والدته.

ثانيا فيلم حسن و نعيمة من انتاج الاستاذ محمد عبد الوهاب! يعني حتى المنتج الحقيقي الهانم غيرته علشان تخلق فتنة ان علاقة محرم لم تكن جيدة بعبد الوهاب اللي الى اّ خر ايامه كان دائم الاتصال بمحرم و كنت بأرد على التليفون بنفسي و اسلم عليه! و كذب ايضا ان الفنان ماهر العطار كان مرشح للفيلم و اعتذر! ده كلام فاضي! بقى في فيلم من انتاج العملاق محمد عبد الوهاب و اخراج هنري بركات و يعتذر؟! كانو بيبحثوا على شخصية تجسد حسن لأعوام حتى وجدوها في محرم فقط دون غيره! و عبد الوهاب اللي نصح بتغيير اسم حسين مش احد المنتجين! و قعدوا لأيام يكتبو كثير من الاسامي امام محرم يعني مثلا محرم أحمد، محرم عادل الخ حتى اعجبهم اسم فؤاد و اصبح محرم فؤاد. الناس دي كانت من صناع صياغة الفن و الابداع مش اللي بنشوفو اليومين دول!

ثالثا، شادية ايه اللي رفضت تمثل معاه؟هو كان في فيلم مطروح اصلا بينهم؟ ابدا! و صباح قالت كدة ازاي؟ مهي مثلت معاه فيلم الصبا و الجمال….سبحان الله…

رابعا و للاختصار، كانت تجمعه علاقة ود و اخوة و صداقة بجميع الفنانين و الملحنين و الشعراء و جميعهم عملوا معه اعمال لا تنسى و عبد الحليم حافظ كان من المقربين له و دائما يلتقون في بيت محرم و في لندن ايضا! كونه لحن بعض اعماله و كتبها بأسمه فهي نالت شهرة واسعة و منها غدارين و قولي بحبك و غيرها. هي أم كلثوم او حليم او غيرهم من كبار الفنانين مكانوش بيضيفوا في الحانهم مثلا؟ كونها تقول كانو بيحاربوه علشان كان بيلحن لنفسه شيء فعلا مضحك… علاقة محرم ببليغ و الموجي و غيرهم كانت علاقة اكثر من اعمال فنية فهم بمثابة عائلته!

مش حاتكلم عالباقي اللي سجلته بصوتها الغير اعلامي حتى بالنسبة لجوازاته اللي معظما كذب اما ظهوره مع عمرو اديب و تعليقه فأحب اقولكم ان الحلقة و المتصلة في الحلقة كانت متلفقاله و استفذ و كان المرض مسيطر عليه و بعدين رأيه في اي حد ده بيرجعله هو و صدقوني مكنش رأيه لوحده بس الفرق انه قاله في برنامج مع احترامنا لجميع الفنانين.

و اخيرا أرجو من اعضاء الجروب المحبين و المخلصين ان تدخلوا على الفيديو ده و تعملوا اكبر عدد ريبورت لليوتيوب علشان يحذفوا المسخرة و قلة الادب دي و لكم جزيل الشكر و ربنا يرحم والدي و يدخله فسيح جناته و يكتر من محبيه و يبعد ولاد الحرام و الكاذبون.

يذكر أن طارق محرم فؤاد بدأ حياته كمطربا وغنى العديد من الأغنيات العاطفية لكنه لم يمش على درب والده وهجر الفن وعمل بالأعمال الحرة، لكن العجيب أن “تامينو” أو أمير نجل طارق من زوجته البلجيكية وحفيد محرم فؤاد هو مغني وكاتب أغاني شهير.